Ɗaruruwan Yahudawa 'yan-kama-wuri-zauna sun kutsa kai cikin Masallacin Ƙudus da ke gabashin Birnin Ƙudus da aka mamaye, a ranar Litinin, domin murnar bikin Yahudawa na Shavuot, kamar yadda wata hukumar Falasdinawa ta bayyana.

Hukumar Kula da Waƙafi ta Musulunci a Birnin Kudus ta bayyana a cikin wata sanarwa cewa fiye da Yahudawa ‘yan-kama-wuri-zauna 500 sun shiga wannan wurin mai tsarki a rukuni-rukuni ƙarƙashin kariyar sojojin Isra'ila.

Shaidu sun shaida wa kamfanin dillancin labarai na Anadolu cewa mazauna haramtattun gidajen sun shiga wannan wurin mai cike da rikici ta ƙofar Al-Mugharbah, da ke yammacin masallacin mai tsarki.

A cewar kamfanin dillancin labarai na Falasdinawa, Wafa, ‘yan-kama-wuri-zaunan sun gudanar da wasu al'adun Talmudic masu tayar da hankali a ƙofofin masallacin domin murnar bikin ranar Shavuot, wanda kuma aka sani da bikin Makonni.

Tun daga shekarar 2003, Isra'ila tana bai wa ‘yan-kama-wuri-zauna damar shiga wannan wuri da ake taƙaddama a kansa a kusan kullum, sai dai ranakun Juma'a da Asabar.

Masallacin Ƙudus shi ne wurin ibada na uku mafi tsarki ga Musulmai a duniya. Yahudawa suna kiran wannan wuri da suna "Dutsen Haikali," suna ikirarin cewa wurin ya kasance wajen haikalin Yahudawa guda biyu a zamanin baya.

Isra'ila ta mamaye Gabashin Birnin Ƙudus, inda Masallacin Ƙudus yake, a lokacin yaƙin Larabawa da Isra'ila na shekarar 1967.

Ta haɗa dukan birnin a shekarar 1980, matakin da ba a taɓa amincewa da shi ba a matakin duniya.