Kamfanin Meta yana tattaunawa domin zuba jarin da zai iya wuce dala biliyan 10 a cikin kamfanin fasahar ƙirƙirarriyar basira na Scale AI, kamar yadda rahoton Bloomberg News ya bayyana a ranar Lahadi.
Rahoton ya ce, ba a kammala sharuɗɗan yarjejeniyar ba tukuna amma akwai yiwuwar a sake sauya sharuɗɗan da ake da su a ƙasa, bisa ga bayanan wasu majiyoyi da ke da masaniya kan batun.
Kamfanin Scale AI ya ƙi amincewa ya yi tsokaci kan batun, haka kuma shi ma kamfanin Meta wanda shi ne mamallakin Facebook da Instagram da WhatsApp, bai amsa buƙatar jin ta bakinsa da kamfanin dillancin labarai na Reuters ya yi mata ba.
An kafa Scale AI a shekarar 2016, kuma kamfani ne da ke kula da tsara bayanai, wanda manyan kamfanonin fasaha kamar Nvidia, Amazon, da Meta suka tallafa masa.
A baya an kimanta darajar Scale AI kusan dala biliyan 14, kuma yana samar da wata turba ga masu bincike don musayar bayanai masu alaƙa da ƙirƙirarriyar basira, tare da masu ba da gudummawa daga fiye da birane da garuruwa 9,000.
