Fiye da mutane 240 sun rasa rayukansu lokacin da wani jirgin Air India da ya nufin Landan ya yi hatsari jim kaɗan bayan ya tashi daga birnin Ahmedabad a ranar Alhamis, kamar yadda hukumomi suka bayyana, abin da ya zama hatsari mafi muni a duniya cikin shekaru goma a fannin jiragen sama.
Jirgin Boeing 787-8 Dreamliner, wanda ke ɗauke da mutane 242, yana kan hanyarsa zuwa filin jirgin Gatwick, kudu da babban birnin Biritaniya, amma ya faɗa kan wani ɗakin kwanan ɗalibai na makarantar koyar da aikin likita lokacin cin abincin rana.
Aƙalla mutum ɗaya daga cikin fasinjojin ya tsira, kamar yadda 'yan sanda suka bayyana, kuma mutumin ya shaida wa kafafen watsa labarai na Indiya yadda ya ji wata ƙara mai ƙarfi jim kaɗan bayan jirgin AI171 ya tashi.
“Har yanzu muna tantance adadin waɗanda suka mutu, ciki har da waɗanda suka rasa rayukansu a cikin ginin da jirgin ya faɗa,”kamar yadda Vidhi Chaudhary, wata babbar jami’ar ‘yan sanda na jihar, ya shaida wa kamfanin dillancin labarai na Reuters.
Ta ce adadin waɗanda suka mutu ya zarce 240, bayan da aka rage adadin daga abin da aka bayyana a baya na 294 saboda an ƙidaya wasu sassan jikin sau biyu. Ba a tabbatar da adadin waɗanda suka mutu daga cikin jirgin ne ko kuma waɗanda ke ƙasa ba.
Ta ce an gano wani mutum mai rai wanda yake zaune a kujerar 11A, kusa da ƙofar fita ta gaggawa, kuma akwai yiwuwar akwai wasu masu rai a asibiti.
“Bayan sakan talatin da tashin jirgin, sai na ji wata ƙara mai ƙarfi sannan jirgin ya faɗi,” in ji Ramesh Viswashkumar, mai shekaru 40, a tattaunawarsa da jaridar Hindustan Times, wadda ta nuna tikitin jirgin kujerar 11A da sunansa a intanet.
“Komai ya faru cikin sauri,” ya shaida wa jaridar daga gadon asibiti. “Lokacin da na tashi, na ga gawarwaki a kowane wuri. Na tsorata. Na tashi na gudu. Akwai sassan jirgin a kowane wuri,” a cewarsa. “Wani ya riƙe ni ya saka ni a cikin motar asibiti ya kai ni asibiti.”
Ya ce ɗan uwansa, Ajay, yana zaune a wata kujerar daban a cikin jirgin. “Mun yi tafiya tare amma yanzu ba zan iya samun shi ba. Don Allah ku taimaka ku nemo shi,” yana roƙo.
Shugaban ‘yan sandan Ahmedabad, GS Malik, ya ce gawarwakin da aka gano na iya haɗawa da na fasinjoji da kuma na mutanen da suka mutu a ƙasa. Wadanda suka mutu sun haɗa da Vijay Rupani, tsohon babban ministan jihar Gujarat, inda Ahmedabad yake babban birni.
An nemi dangin waɗanda suka mutu su bayar da samfurin DNA don tantance gawarwakin, kamar yadda sakataren lafiya na jihar, Dhananjay Dwivedi, ya shaida wa manema labarai.
Sassan jirgin sun watse a kusa da ginin da ya kama da wuta. Goshin jirgin yana makale a saman ginin.
Fasinjojin sun haɗa da manya 217, da yara 11 da jarirai biyu, kamar yadda wata majiya ta shaida wa Reuters. Air India ya ce 169 daga cikin fasinjojin 'yan ƙasar Indiya ne, 53 'yan Biritaniya, bakwai 'yan ƙasar Portugal, da ɗaya ɗan ƙasar Kanada.
Wannan shi ne karo na farko da Dreamliner ya yi hatsari tun lokacin da aka fara amfani da shi a kasuwanci a shekarar 2011, kamar yadda bayanan Aviation Safety Network suka nuna. Jirgin da ya yi hatsarin a ranar Alhamis ya fara tashi a shekarar 2013 kuma an sayar wa Air India a watan Janairun 2014, kamar yadda Flightradar24 ya bayyana.
