Përfaqësuesi i posaçëm i Türkiyes për procesin e normalizimit, ambasadori në pension Serdar Kilic, dhe homologu i tij armen, nënkryetari i Parlamentit Ruben Rubinyan, u takuan të premten për një raund të gjashtë bisedimesh.

Gjatë takimit në kryeqytetin e Armenisë, Jerevan, ata riafirmuan angazhimin e tyre për ta ndjekur procesin e normalizimit “pa parakushte” dhe ranë dakord ta përshpejtojnë zbatimin e marrëveshjes për pikat e kalimit kufitar mes dy vendeve, sipas një deklarate të Ministrisë së Jashtme turke.

Të dy konfirmuan çështjet e dakorduara në diskutimet e tyre të mëparshme, të cilat kishin për qëllim avancimin e procesit të plotë të normalizimit midis dy vendeve.

Kilic dhe Rubinyan shkëmbyen mendime mbi zbatimin e marrëveshjes për pikat e kalimit kufitar, e cila ishte arritur në një takim në korrik 2022.

Ata gjithashtu vendosën që autoritetet përkatëse në të dyja vendet të kryejnë punën e nevojshme teknike për rehabilitimin dhe riaktivizimin e hekurudhës Kars-Gyumri dhe të interkonektorit elektrik.

Më tej, ata ranë dakord të forcojnë bashkëpunimin në fushat e kulturës dhe akademisë, veçanërisht përmes krijimit të mundësive të bursave për studentët e arsimit të lartë dhe përmes restaurimit të përbashkët të Urës historike të Rrugës së Mëndafshtë.

Përveç kësaj, Kilic dhe Rubinyan arritën një mirëkuptim për të ndërmarrë punën e nevojshme që linjat ajrore të tjera të interesuara të mund të nisin fluturime drejt destinacioneve të ndryshme duke filluar nga vera e ardhshme, duke rritur kështu udhëtimet ajrore dhe numrin e fluturimeve midis dy vendeve fqinje.