Anëtarët e grupit terrorist PKK kanë filluar t'i dorëzojnë armët të premten në provincën Suleymaniye të Irakut, një zhvillim i rëndësishëm në përputhje me përpjekjet e Ankarasë për të arritur një Türkiye pa terror.

Pas operacioneve të vazhdueshme dhe efektive kundër terrorizmit të drejtuara nga forcat e sigurisë turke, PKK-ja shpalli në maj se do të shpërbëhej dhe do të çarmatoset, duke shënuar një moment historik në luftën disadekadëshe të vendit kundër terrorizmit.

Ndërkohë, shteti turk e ka zgjeruar luftën kundër terrorizmit edhe në arenën diplomatike.

Vite presioni të qëndrueshëm mbi partnerët ndërkombëtarë — veçanërisht në Evropë dhe Lindjen e Mesme — kanë dhënë rezultat.

Aftësia e PKK-së për të vepruar lirshëm në kryeqytete të huaja, për të pastruar para dhe për të mbledhur fonde nën mbulesa të ndryshme politike është zvogëluar ndjeshëm. Rritja e peshës gjeopolitike të Türkiyes bën që shqetësimet e saj të merren gjithnjë e më seriozisht nga fuqitë botërore.

Përmes lidhjeve ekonomike, diplomacisë së energjisë dhe partneriteteve rajonale, Ankaraja ka arritur t'i presë gradualisht rrjetet mbështetëse të PKK-së jashtë vendit.

Një zëdhënës i Partisë për Drejtësi dhe Zhvillim (AK Parti) të Presidentit Recep Tayyip Erdoğan tha të mërkurën mbrëma se dorëzimi i armëve duhet të përfundojë brenda pak muajsh.

Në një intervistë për televizionin NTV, Omer Celik shpjegoi se një ekip verifikimi — i përbërë nga zyrtarë të inteligjencës turke dhe forcave të armatosura — do ta monitorojë procesin e çarmatimit.

“Procesi i çarmatimit (në Irak) duhet të përfundojë brenda tre deri në pesë muaj... Nëse e kalon këtë periudhë, mund të bëhet i prekshëm ndaj provokimeve,” tha Celik.

Për më shumë se 40 vjet, Türkiye ka qenë në luftë kundër PKK-së, e cila ka vrarë mbi 40.000 persona përmes sulmeve ndaj civilëve dhe forcave të sigurisë turke.