Komandanti më i lartë ushtarak i Gjermanisë premtoi të premten se vendi i tij do të mbrojë “çdo centimetër” të territorit të NATO-s, pas shkeljes së hapësirës ajrore polake nga dronët rusë që rriti tensionet.
Gjenerali Carsten Breuer, oficeri më i lartë ushtarak gjerman, i bëri komentet gjatë stërvitjes ushtarake Quadriga 2025 në Lituani, duke theksuar angazhimin e fortë të Gjermanisë për mbrojtjen kolektive në krahun lindor të NATO-s.
“Shkelja e fundit e hapësirës ajrore të Polonisë nga Rusia tregoi edhe një herë sa i rëndësishëm është angazhimi ynë. Kontributi ynë për mbrojtjen e krahut lindor të NATO-s është i besueshëm, jemi gati të mbrojmë çdo centimetër të territorit të aleancës,” tha Breuer për agjencinë gjermane të lajmeve DPA.
Ai theksoi se stërvitjet aktuale përfaqësojnë herën e parë që Gjermania zhvillon trajnim kaq të gjerë logjistik për të mbështetur trupat e NATO-s në një skenar të mundshëm konflikti në Evropën Lindore.
Deklaratat e Breuer-it pasuan incidentin e së mërkurës, kur dronët rusë hynë në hapësirën ajrore të Polonisë gjatë një sulmi të madh mbi Ukrainën. Forcat polake dhe ato të NATO-s rrëzuan disa nga dronët, duke shënuar herën e parë të një veprimi të tillë mbrojtës.
Ministria ruse e Mbrojtjes mohoi çdo synim për të goditur objektiva në territorin polak, duke pretenduar se sulmet kishin shënjestër ndërmarrje të kompleksit ushtarako-industrial të Kievit në Ukrainën Perëndimore.
