Dhowr siyaasi oo ay ku jiraan labo madaxweyne oo hore oo Afrikaan ah iyo xubno kale ayaa Khamiistii loo diiday inay galaan Angola, iyagoo u socday ka qeybgalka shir uu soo qabanqaabiyay xisbiga mucaaradka ee ugu weyn dalka (UNITA).
Xisbiga Qaranka ee Madax-bannaanida Angola (UNITA), oo ah xisbiga labaad ee ugu weyn dalka, ayaa sheegay inuu casuumaad u fidiyay hoggaamiyeyaasha mucaaradka sida Tundu Lissu oo ka socda Tansaaniya iyo Venancio Mondlane oo ka socda Mozambique, si ay uga qeyb galaan shir looga hadlayay dimuqraadiyadda.
"Mas’uuliyiinta hey’ada socdaalka ee Angola ayaa iga hor istaagay aniga iyo wafdi ka kooban in ka badan labaatan hoggaamiye sare, inaan u galno dalka," ayuu Lissu ku qoray bartiisa baraha bulshada.
Sido kale, madaxweynihii hore ee Kolombiya, Andres Pastrana, ayaa isaguna bartiisa X (Twitter) ku sheegay in loo diiday gelitaanka Angola, iyadoo laga celiyay garoonka diyaaradaha ee Luanda.
Ugu yaraan 20 siyaasi oo la mamnuucay
Senatarka Kenya, Edwin Sifuna, ayaa sidoo kale xaqiijiyay in isagana laga mamnuucay Angola, isagoo bartiisa baraha bulshada soo dhigay warqad ka timid UNITA oo ku socota madaxda hay’adaha socdaalka ee Angola.
Warqaddan, oo taariikheysneyd 12-kii Maarso, waxay xustay in Sifuna iyo lix siyaasi oo kale oo ay ku jiraan labo Ukrainiyan ah, ay u safri lahaayeen Garoonka Caalamiga ah ee Quatro de Fevereiro ee Luanda.
Lama oga tirada rasmiga ah ee siyaasiyiinta loo diiday inay galaan dalka, balse ilo wareedyo badan ayaa u sheegay AFP in ugu yaraan labaatameeyo qof, oo ay ka mid yihiin labo madaxweyne hore iyo dhaqdhaqaaqayaal xuquuqda aadanaha, laga mamnuucay inay galaan Angola.
Dowladda oo ka aamusan go’aanka
Xildhibaan Nelito da Costa Ekwiki, oo ka tirsan UNITA, ayaa cambaareeyay tallaabadan, isagoo sheegay in ay dhaawaceyso sumcadda Madaxweynaha João Lourenço, kaasoo hadda ah Guddoomiyaha Midowga Afrika.
Dowladda Angola weli wax jawaab ah kama aysan bixin arrintan.
Cadaadiska iyo sumcadda Angola
Angola, oo ah dal qani ku ah kheyraadka kuna yaal Koonfurta Afrika, ayaa isku dayday inay dhisto sumcad dhex-dhexaadineed, gaar ahaan dadaallada nabadeed ee Jamhuuriyadda Dimuqraadiga ah ee Congo (DRC).
Dalkaasi waxaa burburiyay dagaal sokeeye oo socday 27 sano, kaasoo qarxay isla markii ay Angola xornimada ka qaatay Portugal sanadkii 1975-kii, iyadoo UNITA ay dagaal kula jirtay xisbiga MPLA, oo weli haya talada dalka.
Hay’adaha u dooda xuquuqda aadanaha iyo dhaqdhaqaaqayaasha mucaaradka ayaa ku eedeeyay hoggaanka Angola inay sare u qaadeen caburinta siyaasadeed, iyagoo soo rogay sharciyo cusub oo xadidaya warbaahinta iyo mudaaharaadyada shacabka.
