Wasiirka Arrimaha Dibadda ee Turkiga, Hakan Fidan, iyo Xoghayaha Arrimaha Dibadda ee Mareykanka, Marco Rubio, ayaa ku wadahadleen qaab taleefan ah iyagoo isla soo qaadeen dadaallada socda ee diblomaasiyadeed ee lagu doonayo in lagu soo afjaro dagaalka Ukraine, sida ay xaqiijiyeen ilo diblomaasiyadeed.

Wadahadalkan ayaa dhacay Talaadadii, maalin un kadib markii uu Turkigu martigeliyay wejigii labaad ee wadaxaajoodyada nabadeed ee u dhexeeya wufuud ka kala socotay Ruushka iyo Ukraine, oo ka dhacay magaalada Istanbul.

Intii lagu guda jiray shirkan, Ruushka iyo Ukraine waxay ku heshiiyeen is-weydaarsi cusub oo maxaabiis, iyagoo diiradda saarayay dadka nugul sida dhalinyarada iyo maxaabiista si xun u dhaawacmay iyadoo sidoo kale la isku afgartay in la isu celiyo maydadka ilaa 6,000 oo askari oo ka kala dhintay labada dhinac.

Wadahadallo ku saabsan gobolka oo ballaaran

Marka laga soo tago arrimaha Ukraine, Fidan iyo Rubio waxay sidoo kale isdhaafsadeen aragtiyo la xiriira xaaladda bini’aadantinimo ee kasii daraysa ee Gaza, iyo xasilooni darrada weli ka jirta dalka Suuriya.

Inkasta oo aan faahfaahin dheeraad ah la bixin, ilo diblomaasiyadeed oo Turki ah ayaa sheegay in wadahadalku ahaa “mid wax dhisaya” isla markaana “sii socda.”

Shirka Isniintii dhacay ayaa ahaa dadaalkii labaad ee lagu qabto Istanbul, waxaana ka horreeyay wareegii koowaad ee wadahadallada nabadeed oo dhacay 16-kii May. Inkastoo xabbad-joojin rasmi ah aan weli la gaarin, haddana falanqeeyayaashu waxay u arkaan is-weydaarsiga maxaabiista iyo celinta maydadka dagaalyahannada inay yihiin tallaabo yar balse muhiim ah oo lagu yareynayo gacan-ka-hadalka.

Turkiga ayaa isku dayaya inuu dhexdhexaadiye ka noqdo khilaafka, isagoo xariir diblomaasiyadeed la leh labada dhinac—Kyiv iyo Moscow. Dhanka kale, Mareykanku wuxuu taageero milatari iyo diblomaasiyadeed siiya Ukraine, balse sidoo kale wuxuu garab istaagaa dadaallada lagu horumarinayo gargaar bini’aadantinimo iyo wadahadal.