Muwaadiniinta Turkida ah oo saarnaa markabka Madleen, oo ay ciidanka Israa’iil qabteen xilli uu isku dayayay inuu gargaar gaarsiiyo Qaza, ayaa xaaladdooda si dhow loola socdaa, sida ay sheegeen ilo ka tirsan Wasaaradda Arrimaha Dibadda ee Turkiga.

Dadkii la xiray ayaa markabka ka degay fiidkii Isniinta, waxaana booqday mas’uuliyiin ka socda Safaaradda Turkiga ee Tel Aviv. Taageero buuxda ayey qunsuliyaddu siisay muwaadiniinta Turkiga, waxaana qoysaskooda lagu wargeliyay xaaladdooda, sida laga soo xigtay ilo wareedyo maalinimadii Talaadada.

Hawlgalkan ugu dambeeyay oo ay soo qabanqaabisay isbahaysiga rayidka ah ee "Freedom Flotilla Coalition" ayaa ujeedkiisu ahaa in la jebiyo xayiraadda saaran Qaza iyo in gargaar la gaarsiiyo dadka tabaalaysan ee reer Falastiin. Markabkan oo dhererkiisu yahay 18 mitir (59 feet) ayaa 1-dii Juun ka ambabaxay dekedda San Giovanni Li Cuti ee Catania, Talyaaniga, isagoo ku sii jeeday Qaza.

Dadka u dooda xuquuqda aadanaha ee saarnaa Madleen ayaa ku dhawaaqay inay qaadan doonaan mowqif nabadeed oo aysan iska caabbin doonin haddii ciidanka Israa’iil soo farageliyaan. Ciidanka Israa’iil ayaa Isniintii carqaladeeyey markabka Madleen oo ujeedkiisu ahaa inuu jebiyo xayiraadda saaran Qaza.

Markabka waxaa saarnaa xubno ay ka mid yihiin Rima Hassan oo u dhalatay Faransiiska ahna Xildhibaan ka tirsan Baarlamaanka Yurub, Yasemin Acar oo Jarmal ah, Huseyin Suayb Ordu oo u dhashay Turkiga, Thiago Avila oo u dhashay Brazil, Sergio Toribio oo Isbaanish ah, Marco van Rennes oo u dhashay Netherlands, Baptiste Andre, Reva Viard, Pascal Maurieras, iyo Yanis Mhamdi oo dhammaantood Faransiis ah, Greta Thunberg oo Iswiidhish ah una doodda arimaha cimilada, iyo weriye Cumar Fayaad.