Madaxweynaha Nigeria Bola Tinubu ayaa Arbacada u safraya Faransiiska booqasho laba toddobaad ah, halka wasiirrada arrimaha dibadda ee saddex dal oo Galbeedka Afrika ah oo ay militarigu hoggaamiyaan ay ku wajahan yihiin Moscow si ay u xoojiyaan xiriirka Ruushka.
Wasiirrada arrimaha dibadda ee Burkina Faso, Mali iyo Niger ayaa ku dhawaaqay inay Khamiista u safri doonaan Moscow si ay wadahadallo ula yeeshaan dhiggooda Ruushka Sergey Lavrov.
Saddexda waddan ayaa xiriirka u jaray urur goboleedka Galbeedka Afrika ee ECOWAS oo uu madax u yahay Tinubu, iyagoo ku eedeeyay inuu u janjeero danaha reer Galbeedka.
Waxay ururka ka go'een sannadkii hore, iyagoo sameystay isbahaysi loo yaqaan Isbahaysiga Dowladaha Sahel AES si ay u xoojiyaan iskaashigooda dhinacyada amniga, dhaqaalaha iyo horumarinta.
Tan iyo markaas waxay iska fogeeyeen gumeystihii hore ee Faransiiska, iyagoo ka saaray ciidamadiisa ayna u jareen xiriirkii dhaqaale.
Mali, Niger iyo Burkina Faso waxay si dhow ula shaqeynayeen shuraakooyin kale, oo ay ku jiraan Ruushka iyo Turkiga, iyagoo xoojinayay xiriirka diblomaasiyadeed, amni iyo dhaqaale sannadihii la soo dhaafay.
Tinubu oo ka fiirsanaya dib-u-habaynta
Isla markiiba ma cadda in booqashada Tinubu ee Paris ay xiriir la leedahay booqashada diblomaasiyiinta sare ee Sahel ay ku tagayaan Moscow.
Si kastaba ha ahaatee, madaxtooyada Nigeria ayaa sheegtay in inta lagu guda jiro booqashada, Tinubu, oo xukunka yimid bishii Maajo 2023, "uu qiimeyn doono waxqabadka muddada-dhexe ee maamulkiisa uuna eegi doono guulaha muhiimka ah."
Afhayeenka Madaxweyne Tinubu, Bayo Onanuga, ayaa warbixin ku sheegay in safarku uu sidoo kale hoggaamiyaha Nigeria siin doono fursad uu uga fikiro hoggaamintiisa iyo dib-u-habaynta dhaqaalaha. "Wakhtigan fikirka ayaa saldhig u noqon doona qorshayaasha lagu sii qotodheeraynayo dib-u-habaynta socota laguna dardargelinayo mudnaanta horumarinta qaranka sannadka soo socda," ayuu ku yiri bayaanka.
Niger, oo xuduud dheer la wadaagta Nigeria, ayaa ku eedaysay Abuja inay la shirqoolayso Paris si ay u khalkhal geliso, eedeyntaas oo ay dawladda Nigeria beenisay.
