Dawladda Federaalka Soomaaliya iyo Qaramada Midoobay ayaa yeeshay kulan wadajir ah oo guddiga hagidda ay ku xoojinayaan iskaashiga horumarineed ee labada dhinac. Kulankan ayaa diiradda lagu saaray horumarinta barnaamijyada horumarineed ee Qaramada Midoobay ay ka wado Soomaaliya, iyadoo diiradda la saarayo qorshayaasha mudnaanta u leh dowladda federaalka ah ee Soomaaliya.
Kulanka waxaa si wadajir ah u guddoomiyay Wasiirka Qorsheynta Qaranka Mudane Maxamuud Abdirahman Sheekh Farah (Beenebeene) iyo ku-xigeenka Wakiilka Gaarka ah ee Qaramada Midoobay ee Soomaaliya, Mr. George Conway. Waxaa sidoo kale furitaanka si rasmi ah u sameeyay Ra’iisul Wasaare ku-xigeenka dalka Salah Ahmed Jama.
Intii uu socday shirka, waxaa dib loo eegay waxqabadka barnaamijyada Qaramada Midoobay ee 2024, iyadoo la ansixiyay qorshaha mudnaanta leh ee sannadka 2025. Waxaa sidoo kale laga dooday sidii loo diyaarin lahaa wareegga cusub ee iskaashiga ee 2026–2030, iyadoo la adkeeyay muhiimadda ay leedahay xoojinta maamul wanaagga, dhaqaalaha, adeegyada bulshada, iyo adkeysiga cimilada.
Mr. Conway ayaa amaanay hogaaminta dowladda Soomaaliya ee dhinaca horumarinta, wuxuuna ballan qaaday in Qaramada Midoobay ay si buuxda u garab taagan tahay qorshaha horumarineed ee Soomaaliya, gaar ahaan Aragtida 2060 iyo Qorshaha Horumarinta Qaranka.
Shirka ayaa lagu soo gebagebeeyay heshiisyo ku saabsan tallaabooyinka la qaadi doono kahor dhamaadka 2025, oo ay ka mid yihiin kormeer wadajir ah iyo diyaarinta qorshaha iskaashiga ee soo socda. Waxaa sidoo kale la isku raacay in la isugu yimaado dhammaadka sannadka si loo qiimeeyo horumarka la gaaray iyo in iskaashigu uu si dhow ula socdo baahiyaha horumarineed ee Soomaaliya.
