Wasiirka Beeraha iyo Waraabka ee Dowladda Federaalka Soomaaliya, Mudane Maxamed Cabdi Xayir (Maareeye), ayaa maanta si rasmi ah uga furay xarunta wasaaradda ee Muqdisho barnaamij tababar cusub oo la xiriira adeegsiga Internet of Things (IoT). Barnaamijkan waxaa loogu talagalay in dhalinyarada Soomaaliyeed lagu baro xirfado cusub oo casri ah si ay uga jawaabaan caqabadaha dhanka beeraha ee dalka ka jira.

Waxaa la soo xulay 50 qof oo dhalinyaro ah, oo isugu jira rag iyo dumar, kuwaas oo ka mid ahaa 776 qof oo soo codsaday barnaamijka, iyadoo kala bar codsadayaashu ay ahaayeen haween. Dhalinyaradan ayaa lagu tababari doonaa farsamooyin casri ah oo beeraleyda loogu adeego, sida nidaamyada waraabka ee horumarsan, qalabka la socodka dalagyada, iyo xalal dijitaal ah oo kor u qaadaya dhaqamada beeraha waara.

Ujeeddada barnaamijku waa in dhalinyarada iyo hal-abuurayaasha la dhiirrigeliyo si ay tiknoolajiyada ugu adeegtaan horumarinta beeraha dalka, loogana faa’iideeyo abuurista shaqo iyo kobcinta dhaqaalaha.

Tababarkan ayaa socon doona muddo lix toddobaad ah, waxaana bixinaysa Xarunta Kobcinta Hal-abuurrada ee Jaamacadda Jamhuuriya, Jamhuriya Incubation Center (JIC), iyada oo ay kaabayso Xarunta Hal-abuurka iyo Horumarinta Ganacsiga Beeraha (CIAD) ee Wasaaradda Beeraha iyo Waraabka JFS.