Turkiga ayaa qaaday tallaabo uu argagixisada uga saarayo ajendaha dalka iyo gobolkaba, iyada oo loo marayo hindisaha 'Argagixiso ka-xoreynta Turkiga', sida uu sheegay Madaxweynaha Turkiga Recep Tayyip Erdogan oo khadka taleefanka kula hadlay Hogaamiyaha Imaaraadka Carabta Sheikh Mohamed bin Zayed Al Nahyan.

Intii lagu jiray wadahadalka khadka telefonka oo qabsoomay maalinimadii Axadda, Erdogan wuxuu sheegay in dadaalladan ay si go'aan leh u sii socon doonaan, sida laga soo xigtay Agaasinka Warfaafinta Madaxtooyada Turkiga.

Sheikh Mohamed bin Zayed Al Nahyan ayaa dhankiisa muujiyey in yoolka 'Argagixiso ka-xoreynta Turkiga' uu si weyn uga qayb qaadan doono amniga gobolka, isaga oo sidoo kale u rajeeyey in geeddi-socodkan uu ku soo dhamaado guul.

Erdogan wuxuu sidoo kale carabka ku adkeeyey in iskaashiga istiraatiijiyadeed ee u dhexeeya Turkiga iyo Imaaraadka Carabta uu natiijooyin wanaagsan ka dhaliyey dhammaan dhinacyada, isaga oo xusay fursadaha waaweyn ee u dhexeeya labada dal, gaar ahaan warshadaha difaaca iyo tiknoolojiyadda casriga ah.

Madaxweynaha Turkiga wuxuu intaas ku daray in Ankara ay si dhow ula socoto wadaxaajoodyada nabadeed ee u dhexeeya Azerbaijan iyo Armenia kuwaas oo lagu qabtay Abu Dhabi, isla markaana ay sii wadi doonto taageerada dadaallada lagu doonayo in lagu dhiso xasillooni waarta oo ka dhacda mandiqadda Qafqaaska.