Wadahadallo u dhexeeya Jamhuuriyadda Dimuqraadiga ah ee Kongo iyo kooxda fallaagada ah ee M23 ayaa Arbacadii ka socday Qadar, si looga wadahadlo xabbad-joojin buuxda, sida uu AFP u sheegay diblomaasi aqoon u leh wadahadallada.
"Ergooyinka ka socda Jamhuuriyadda Dimuqraadiga ah ee Kongo (DRC) iyo M23 ayaa hadda ku sugan Doha, iyadoo Qadar ay fududeyneyso wadahadallada." ayuu diblomaasi u sheegay AFP, isagoo aan dooneyn in magaciisa la shaaciyo xasaasiyadda wadahadallada awgeed.
M23, oo la sheegay in ay taageero ka hesho Rwanda, ayaa toddobaadkii hore ku baaqday wadahadallo dheeraad ah si wax looga qabto dhibaatooyinka ka dhiman heshiis nabadeed oo ay kala saxiixdeen Kigali iyo Kinshasa oo lagu qabtay Washington bishii Juun.
"Wareeggan wadaxaajoodka ayaa muhiim u noqon doona gaaritaanka heshiis," ayuu yiri diblomaasigu, isagoo intaa ku daray in dhexdhexaadiyayaasha ka soo jeedo Qadar ay si dhow ula shaqeynayaan Midowga Afrika.
"Dagaal khasaare leh"
Heshiiska ay kala saxiixdeen DRC iyo Rwanda ayaa looga gol lahaa in lagu soo afjaro dagaalka ay ku dhinteen kumanaan qof bariga DR Congo oo hodan ku ah macdanta.
Si kastaba ha ahaatee, M23, oo ah kooxda ugu weyn ee hubaysan ee la dagaallanta ciidamada Kongo, kuma sugneyn wadahadalladii Washington, waxayna ku baaqday "heshiis xabbad-joojin oo gaar ah" oo ay la yeelato dawladda DRC.
M23 ayaa weerar kedis ah qaaday bishii Janaayo iyo Febraayo, waxa ayna qabsatay dhul ballaaran oo ku yaal bariga DRC, oo ay ku jiraan caasimadaha gobolka ee muhiimka ah sida Goma iyo Bukavu.
Muddo ka badan saddex iyo toban sano, colaad ayaa ka taagneyd bariga DRC taasoo boqollaal kun oo qof guryahoodii ka barakicisay.
Rwanda: M23 ma taageertaa?
Rwanda, oo ah dal deris la ah Jamhuuriyadda Dimuqraadiga ah ee Congo (DRC), ayaa beenisay inay taageero militari siiso kooxda M23.
Si kastaba ha ahaatee, khubaro ka socota Qaramada Midoobay ayaa sheegay in ciidamada Rwanda ay door muhiim ah ka ciyaareen weerarada ay geysato kooxda M23, taasoo ay ku jirto ka qeyb qaadashada dagaalka tooska ah.
