Golaha Wasiirrada Xukuumadda Jamhuuriyadda Federaalka Soomaaliya ayaa ansixiyey xubnaha Guddiga Tacliinta Sare ee Qaranka, sida lagu sheegay kulankoodii asbuuclaha ahaa ee maanta.

Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa shir-guddoominayey kulanka.

Wasaaradda Waxbarashada ayaa horay u soo gudbisay guddigan oo ka kooban 15 xubnood oo aqoonyahanno ah.

Dr. Cabdinuur Maxamud ayaa loo magacaabay Guddoomiyaha Guddiga, halka Dr. Maxamed Cali Faarax loo magacaabay Guddoomiye Kuxigeenka.

Muhiimmada guddiga

Ansixinta guddigan waxay muhiim u tahay horumarinta tacliinta sare ee dalka iyo dejinta siyaasado qaran oo waafaqsan qorshaha qaranka.

Guddiga Tacliinta Sare ee Qaranka wuxuu ka shaqeyn doonaa horumarinta hey’adaha tacliinta sare ee dalka, iyadoo loo dejinayo siyaasado qaran iyo halbeegyo.

Guddigan ayaa loo xilsaaray waajibaadyo ay ka mid yihiin dejinta siyaasadaha qaran, horumarinta tacliinta sare, dejinta halbeegyada qaran, iyo korjoogtaynta siyaasadaha dowladda ee ku aadan tacliinta sare.

Guddiga ayaa lagu soo xulay si hufnaan iyo caddaalad ah, sida ay xukuumaddu sheegtay.