Qarax ayaa dilay saddex askari oo Kenyan ah kuwaas oo ku jiray howlgallo ilaalin waddo oo ka socday bariga dalka Kenya, meel u dhow xadka Soomaaliya, sida ay sheegeen ciidanka milatariga Kenya.

Ururka Al-Shabaab, oo xiriir la leh Al-Qaacida, ayaa boggooda internetka ku sheegtay in ugu yaraan laba askari Kenyan ah la dilay tiro kalena lagu dhaawacay qarax lala beegsaday kolonyo ciidan, balse si toos ah uma aysan sheegan mas’uuliyadda weerarka.

Qaraxa ayaa dhacay aroornimadii Talaadada, waxaana uu ka dhacay waddada u dhaxaysa Sankuri iyo Kiunga — magaalo xeebeed qiyaastii 12 km (7.5 mayl) u jirta xadka Soomaaliya, sida lagu sheegay war kasoo baxay ciidanka.

“Nasiib darro saddex askari oo geesiyaal ah ayaa u geeriyooday dhaawacyadii kasoo gaaray qaraxa. Askartan waxay u dhintaan si ay u gutaan waajibaadkooda,” ayaa lagu yiri bayaan ay soo saareen Milatariga Kenya.

Al-Shabaab ayaa gacanta ku haysa dhul ballaaran oo ku yaalla koonfurta iyo bartamaha Soomaaliya, waxayna marar badan weerarro ku qaaddaan bartilmaameedyo ciidan iyo rayid ah gudaha Kenya. Khubarada amniga ayaa sheegaya in weeraradan ay qayb ka yihiin dadaallada lagu doonayo in Kenya looga saaro ciidamada nabad ilaalinta ee ka jooga Soomaaliya.