Ciidamada Pakistan iyo Afgaanistaan ​​ayaa ku heshiiyay xabbad-joojin laba maalmood ah oo ka dhacaysa marin muhiim ah oo xuduudka ah, kaddib dhowr toddobaad oo colaado ah, sida uu sheegay sarkaal sare.

Isgoyska Torkham, oo ay Pakistan xirtay dabayaaqadii bishii hore sababo la xiriira muran ka dhashay dhismaha isbaaro cusub oo laga dhisayo dhanka Afgaanistaan, ayaa sii xirnaan doona ilaa laga gaarayo wareegga xiga ee wadahadalka.

Dagaalladii ka dhacay labadii toddobaad ee la soo dhaafay ayaa sababay dhimashada ugu yaraan hal qof iyo dhaawaca dhowr kale, iyadoo boqolaal qoys ay ku barakaceen rasaas culus oo la isweydaarsaday.

Heshiiskan ayaa la gaaray maalintii Axadda intii lagu guda jiray jirga ama shir beeleed ka dhacay xadka Torkham, kaas oo ay ka soo qeyb galeen hoggaamiyeyaasha qabaa’ilka labada dhinac. Sarkaal sare oo ka tirsan Pakistan, oo codsaday in aan magaciisa la shaacin sababo la xiriira xayiraadda saxaafadda, ayaa sidaas u sheegay wakaaladda wararka ee Anadolu.

Dhanka Afgaanistaan, waxaa shirka uga qaybgalay 35 xubnood oo odayaal qabiil ah. Labada dhinac ayaa si gaar ah u ballan qaaday in aan la dhisi doonin wax dhisme ah oo cusub inta lagu jiro muddada wadahadalka, sida uu sarkaalku sheegay. Waxaa sidoo kale la filayaa in isgoyska Torkham dib loo furo kaddib wareegga labaad ee wadaxaajoodka.

Xiritaanka isgoyska Torkham, oo isku xira gobolka Khyber Pakhtunkhwa ee waqooyi-galbeed Pakistan iyo gobolka Nangarhar ee bariga Afgaanistaan, ayaa sababay khasaaro ganacsi oo dhan $3 milyan maalintii, sida laga soo xigtay ilo rasmi ah.

Torkham waa mid ka mid ah 18-ka isgoys ee u dhexeeya labada dal, kuwaas oo muddo tobanaan sano ah uu ka taagnaa muran xuduudeed, taasoo keentay in isku xirka dhulka si joogto ah loo xiro marar kala duwan.

Waxaa la sheegay in illaa 10,000 oo qof – badankood Afgaanistaan ​​ah – ay maalin kasta maraan isgoyska si ay u helaan adeegyo caafimaad iyo nolol-maalmeedkooda dhanka Pakistan.