Wasiirka Amniga Gudaha ee Dowladda Federaalka Soomaaliya, Mudane Cabdullaahi Sheekh Ismaaciil (Fartaag), ayaa ku qaabilay xafiiskiisa wafdi sare oo ka socday Hay’adda Booliska Caalamiga ah ee INTERPOL, oo uu hoggaaminayay Joaquim Rodrigues, oo ah isku-duwaha barnaamijka hubka ee hay’addaas.
Kulanka ayaa lagu gorfeeyay sidii loo xoojin lahaa iskaashiga caalamiga ah ee la dagaallanka dambiyada caalamiga ah, kor u qaadista is-weydaarsiga xogaha sirdoonka, ballaarinta barnaamijyada tababarrada wadajirka ah, iyo horumarinta baaritaannada la xiriira dambiyada abaabulan, argagixisada, iyo dambiyada elektaroonigga ah.
Waxa kale oo laga wada hadlay kordhinta adeegsiga qalabka muhiimka ah ee INTERPOL ay siiso waddamada xubnaha ka ah, sida iARMS oo ah diiwaanka raadraaca hubka sharci darrada ah, nidaamka xog-weydaarsiga rasaasta, iyo habka aqoonsiga hubka—kuwaas oo muhiim u ah la-socodka iyo ka hortagga hubka sharci darrada ah ee la soo geliyo Soomaaliya.
Wasiir Fartaag ayaa si weyn u bogaadiyay kaalinta ay INTERPOL ka qaadato xoojinta amniga Soomaaliya iyo wadashaqeynta dhow ee ay la leedahay laamaha amniga dalka. Wuxuu sidoo kale carrabka ku adkeeyay sida ay Soomaaliya uga go’an tahay in ay sii xoojiso iskaashigan, isla markaana ay kor u qaaddo dadaallada lagu ciribtirayo dambiyada caalamiga ah ee khatarta ku ah nabadgelyada gudaha iyo tan caalamkaba.
