BOTA
3 MINUTA LEXIMI
UNICEF: Gjatë pandemisë 67 milionë fëmijë nuk u vaksinuan
Besimi në vaksinat e fëmijëve sipas raportit të UNICEF-it, shënoi rënie me 44 për qind në disa vende gjatë pandemisë.
UNICEF: Gjatë pandemisë 67 milionë fëmijë nuk u vaksinuan
UNICEF: Gjatë pandemisë 67 milionë fëmijë nuk u vaksinuan.     /Foto: AA
20 Prill 2023

Të paktën 67 milionë fëmijë humbën plotësisht ose pjesërisht vaksinat midis 2019 dhe 2021 për shkak të bllokimeve dhe funksionimit me ndërprerje të kujdesit shëndetësor të shkaktuar nga pandemia COVID-19, thuhet në raportin e UNICEF-it.

Prej tyre, 48 milionë humbën plotësisht vaksinat, zbuloi raporti i agjencisë së OKB-së për fëmijë, i titulluar "Gjendja e fëmijëve në botë 2023: Për çdo fëmijë, vaksinimi".

"Vaksinat shpëtojnë jetë, por shumë fëmijë në botë nuk po vaksinohen. Pandemia e COVID-19 vetëm se shtoi numrin e tyre", thuhet në raport.

Raporti, ndër të tjerash, thekson se "në tri vitet e fundit, përfitimet e arritura me shumë vështirësi në më shumë se një dekadë në imunizimin rutinë të fëmijëve janë rrënuar", duke shtuar se rikthimi në rrugën e duhur do të jetë sfidues.

"Në përqindje, shkalla e fëmijëve të vaksinuar ra me 5 pikë përqindjeje në 81 për qind. Me fjalë të tjera, rreth një në pesë fëmijë në mbarë botën nuk ishte plotësisht i mbrojtur kundër sëmundjeve të parandalueshme me vaksina", shton më tej raporti.

"Shqetësuese është se regresi gjatë pandemisë erdhi në fund të një dekade kur, në përgjithësi, rritja e imunizimit të fëmijëve kishte ngecur", thuhet në raport.

Sipas të dhënave, besimi në vaksinat e fëmijëve shënoi rënie me 44 për qind në disa vende gjatë pandemisë.

Drejtoresha Ekzekutive e UNICEF-it Catherine Russell tha se të dhënat janë një sinjal dhe një paralajmërim shqetësues.

"Ne nuk mund të lejojmë që besimi në imunizimet rutinë të bëhet një tjetër viktimë e pandemisë. Përndryshe, vala e ardhshme e vdekjeve mund të jetë më e madhe te fëmijët me fruth, difteri ose sëmundje të tjera të parandalueshme", tha ajo.

BURIMI:TRT Balkan / agjencitë
Hidhini një sy TRT Global. Ndani komentet tuaja!
Contact us