Dan wasan Manchester United Lisandro Martinez ba zai sake buga wasa ba a kakar bana bayan ya karye a kafarsa.
Kulob din ne ya bayyana haka a sakon da ya wallafa a shafinsa na intanet ranar Juma'a.
Dan kwallon, mai shekara 25, ya ji rauni ne a wasan da Manchester United da Sevilla suka tashi 2-2 ranar Alhamis a gasar Europa League.
"Amma ana sa rai dan wasan dan kasar Argentina zai warke sarai a kan lokaci domin ya soma wasa a kaka mai zuwa," in ji kulob din.
Shi ma Raphael Varane ya ji rauni lokacin wasan kuma ana sa rai zai kwashe makonni yana jinya.
"Dukkanmu a Manchester United muna yi wa Lisandro da Rapha fatan samun sauki cikin gaggawa," a cewar sakon da kulob din ya wallafa.
United ya sayi Martinez Ajax a watan Yulin da ya gabata a kan kusan £57m kuma bug wa kulob din wasan Firimiya 27 a kakar bana.
