Shugaban Turkiyya, Recep Tayyip Erdogan, a ranar Juma'a ya aika da saƙon taya murna ga al'umma don bikin Eid al Adh, wanda kuma aka fi sani da Babban Sallah.
A cikin wani sakon da ya wallafa a X, Erdogan ya bayyana fatan cewa wannan sallar za ta zama alheri ga "ƙasarmu, al'ummarmu, da bil’adama baki ɗaya."
Ya kuma taya murna ga dukkan 'yan ƙasar Turkiyya da kuma "dukkan abokanmu" a sassa daban-daban na duniya, ciki har da mutanen Gaza da Falasɗinawa, a wannan lokacin na Idi.
Wannan biki yana tunawa da sadaukarwar Annabi Ibrahim (ko Abraham) wanda ya nuna shirinsa na yin hadaya da ɗansa bisa umarnin Allah, kafin Allah ya sauya da rago a karshe.
Musulmai suna yanka dabbobi don tunawa da wannan lamari, sannan su raba naman ga mabukata da danginsu.
Jifan shaiɗan.
Kusan mahajjata miliyan biyu sun fara aikin jifar shaiɗan a Jamarat a safiyar Juma'a, wanda ke nuna ranar farko ta Eid al Adha da kuma daya daga cikin muhimman ayyukan Aikin Hajji a Mina da ke yammacin Saudiyya.
Bayan kammala jifar Jamarat Al-Aqaba, mahajjatan za su ci gaba da sauran ayyukan Idi, ciki har da yanka dabba wanda ke nuna fara bikin kwanaki hudu na Eid al Adha.
Mahajjata za su zauna a Mina a tsawon kwanakin Tashreeq (Asabar zuwa Litinin), suna ci gaba da aikin jifar shaiɗan.
Hukumomin Saudiyya sun sanar a ranar Alhamis Mahajjata sun isa filin Arfa cikin sauƙi ta hanyar amfani da fasahohi na zamani.
Lokacin Aikin Hajji na kwanaki shida ya fara a ranar Laraba, kuma za a ci gaba da kammala sauran ayyuka har zuwa Litinin.
Hukumar Kididdiga ta Saudiyya ta sanar da cewa adadin Mahajjata na shekarar kalandar Hijira ta 1446 AH ya kai 1,673,230, ciki har da 1,506,576 da suka zo daga wajen ƙasar.
Adadin mahajjatan cikin gida, 'yan ƙasar Saudiyya da mazauna, ya kai 166,654.
A bara, fiye da mahajjata Musulmai miliyan 1.8 daga ƙasashe 200 na duniya suka gudanar da Aikin Hajji.
Aikin Hajji shi ne ginshiƙi na biyar na Addinin Musulunci, wanda dole ne duk Musulmi ya gudanar da shi, idan mutum yana da iko da kuɗin yi, aƙalla sau ɗaya a rayuwa.
Aikin Hajji ya ƙunshi ayyuka da dama da ke nuna muhimman ƙa'idojin Addinin Musulunci da kuma tunawa da gwagwarmayar Annabi Ibrahim da iyalinsa.
