Majalisar dokokin Mali da sojoji suka naɗa ta amince a ranar Alhamis da wa’adin shekaru biyar ga shugaban sojojin kasar, wanda za a iya sabunta shi fiye da sau daya ba tare da zabe ba, kamar yadda wani dan jaridar AFP ya bayyana.

Wannan matakin ya ba Janar Assimi Goita damar jagorantar kasar ta yammacin Afirka har zuwa akalla shekarar 2030, duk da alkawarin farko da gwamnatin sojojin ta yi na mika mulki ga farar hula a watan Maris na 2024.

Dokar ta samu amincewa daga Majalisar Rikon Kwarya ta Kasa, wadda ke da mambobi 147, kuma yanzu za ta tafi ga shugaban sojojin don sanya hannu a hukumance.

A baya can, majalisar ministoci, wato Majalisar Zartarwa, ta riga ta amince da wannan matakin a watan da ya gabata.

Karya Alkawari

Lokacin da Goita ya hau mulki bayan juyin mulki biyu a shekarar 2020 da 2021, ya jaddada kudurin Mali na yaki da kungiyoyin 'yan tawaye kuma ya yi alkawarin dawo da mulkin farar hula.

Amma daga bisani sojojin sun karya wannan alkawarin na mika mulki ga farar hula da aka tsara kafin wa’adin watan Maris na 2024.

"Wannan wani babban ci gaba ne wajen sake gina Mali," in ji Malick Diaw, shugaban Majalisar Rikon Kwarya ta Kasa, ga AFP bayan kada kuri’ar ranar Alhamis.

Rikicin da ake fuskanta a Mali na ci gaba da faruwa ne a yayin da hukumomin kasar ke kira ga jama’a su goyi bayan sojojin.

Dakatar da Jam’iyyun Siyasa

Tun daga shekarar 2012, Mali ta fada cikin rikice-rikicen da kungiyoyin 'yan tawaye masu alaka da Al-Qaeda da kungiyar DAESH, tare da wasu kungiyoyin masu aikata laifuka, ke haddasawa.

Wadannan hare-hare sun kara tsananta a makonnin baya bayan nan.

A farkon wannan shekarar, wani taron kasa da sojojin suka kira ya ba da shawarar nada Goita a matsayin Shugaban Ƙasa ba tare da zabe ba, don wa’adin shekaru biyar da za a iya sabunta shi.

Haka kuma, wannan taron ya ba da shawarar rushe jam’iyyun siyasa, wanda gwamnatin sojojin ta aiwatar a watan Mayu.