Rais wa Uturuki Recep Erdogan amewasili Azerbaijan kushiriki katika Mkutano wa 17 wa Jumuiya ya Ushirikiano wa Kiuchumi (ECO), jukwaa muhimu la kikanda linalolenga kuimarisha uhusiano wa kiuchumi kati ya nchi wanachama.

Mkutano huo unafanyika katika mji wa Khankendi, ulioko katika eneo la Karabakh.

Erdogan siku ya Ijumaa alitua kwa mara ya kwanza Fuzuli kabla ya kusafiri hadi mji mwenyeji wa Khankendi.

Ameandamana na maafisa kadhaa wa ngazi za juu wa Uturuki, akiwemo Waziri wa Mambo ya Nje Hakan Fidan, Waziri wa Biashara Omer Bolat, Waziri wa Uchukuzi na Miundombinu Abdulkadir Uraloglu, na Waziri wa Huduma za Familia na Jamii, Mahinur Ozdemir Göktas.

Erdogan anatarajiwa kutoa hotuba katika mkutano huo, ambapo viongozi kutoka jumuiya ya ECO yenye wanachama 10 watajadili kuimarisha ushirikiano katika biashara, nishati, uchukuzi na sekta nyingine muhimu.

Jukwaa la kimkakati

ECO, iliyoanzishwa mwaka wa 1985 na Uturuki, Iran, na Pakistani, imekua na kuwa shirika pana la kikanda na nchi za Asia ya Kati na Caucasus Kusini zikijiunga baada ya Muungano wa Sovieti kuanguka.

Mikutano yake ya kilele hutumika kama jukwaa la kukuza ushirikiano wa kiuchumi, muunganisho wa kikanda, na mazungumzo ya kisiasa.

Mkutano wa mwaka huu unakuja wakati ambapo mtazamo wa kisiasa wa kijiografia katika Caucasus Kusini, haswa kufuatia kurudishwa eneo la Karabakh na kudhibitiwa chini ya utawala wa Azerbaijan mwaka jana baada ya miongo kadhaa ya mzozo na Armenia.

Uturuki, mshirika wa karibu wa Azerbaijan, imeiunga mkono Baku (mji mkuu wa Azerbaijan) katika juhudi zake za maendeleo baada ya vita na katika kupanua njia za usafiri zinazounganisha Asia na Ulaya, ikiwa ni pamoja na kupitia mradi wa Middle Corridor.

Kushiriki kwa Erdogan kunasisitiza muendelezo wa Ankara katika ushirikiano wa kikanda na kuimarisha ushirikiano wake wa kimkakati na Azerbaijan.