Di number of pipo wey don die afta terrorists attack mosque and houses for northwest Katsina state don reach at least 50, wit about 60 oda pipo wey dem carry go, na wetin local officials and residents tok on Wednesday.

Di attack happun early Tuesday for one remote community wey dem dey call Unguwan Mantau, for Malumfashi district, as Muslim pipo gather for Fajr, di prayer wey dem dey do for early morning.

Pipo wey see wetin happun tok say di armed men dem ride come on top motorcycle, begin shoot inside di mosque before dem waka go through di village dey attack.

Aminu Ibrahim, one lawmaker wey dey represent Malumfashi, tok say at least 30 pipo die and 20 oda pipo burn alive for di attack wey him describe as wicked attack on di community.

Katsina police spokesperson, Abubakar Sadiq Aliyu, tok say di police intercept di attackers and stop dem from attacking two villages wey dem plan to attack. But as dem dey run pass Mantau, di attackers begin shoot di residents.

Dem still burn some houses before security pipo fit reach di place, na wetin di police tok.

Survivors tok say di attackers drag women and girls comot for di village. One resident, Muhammad Abdullahi, tok say, "Dem start to dey shoot inside di mosque as pipo dey pray. My neighbour na him dem kill."

On Tuesday, Fatima Abakar, wey be official for di local general hospital, tok Reuters say dem register 27 bodies for di morgue, but many pipo carry di bodies of dia loved ones go bury dem according to Islamic burial rites.

Di northwest part of Nigeria don dey see plenty attacks from gangs wey dem dey call bandits. Di bandits dey target villages and highways, dey kidnap pipo for ransom, and dey collect money from farmers by force.