Qoraal uu soo dhigay bartiisa "Truth Social", Trump wuxuu sheegay in wadahadallo oo uu Mareykanku dhexdhexaadinayay ayaa habeenkii hore dhexmaray Bakistaan iyo Hindiya.
Wuxuu intaa ku daray: "Waxaa farxad ii ah inaan ku dhawaaqo inay Hindiya iyo Bakistaan gaareen heshiis xabbad-joojin dhameystiran oo degdeg ah." Wuxuuna labada dal ku amaanay "sida ay u muujiyeen xikmad iyo is-xakameyn."
Sabtidii, Ciidanka Bakistaan ayaa ku dhawaaqay inay ka jawaabeen beegsigii Ciidamada Hindiya ee ahaa weerar gantaallo ah oo lagu qaaday 3 garoon diyaaradeed oo dalka gudihiisa ah.
Talaadadii, ciidamada Hindiya ayaa ku dhawaaqay inay fuliyeen hawlgallo militari oo ka dhan ah "bartilmaameedyo" ku yaal Bakistaan iyo gobolka "Azad Kashmir" ee ismaamulka leh ee ay iyadu maamusho.
Waxay sheegeen inay beegsadeen 9 goobood oo ay ku tilmaameen inay yihiin "dhismayaal argagixiso," halka dowladda Islamabad ay ku dhawaaqday in la beegsaday 6 goobood oo rayid ah, taasoo keentay dhimashada 31 qof iyo dhaawaca 57 kale.
Xiisadda u dhaxaysay Hindiya iyo Bakistaan waxay sii korodhay Abriil 22-keedii hore, kadib markii rag hubaysan ay rasaas ku fureen dalxiisayaal ku sugnaa magaalada Pahalgam ee gobolka "Jammu iyo Kashmir" ee Hindiya maamusho, taasoo keentay dhimashada 26 qof iyo dhaawaca qaar kale.
