Kooxda Al-Shabaab ayaa weerar ku qaaday xero boolis oo ku taalla deegaanka Biyamadhow, oo ka tirsan degmada Garissa ee xuduudda Kenya iyo Soomaaliya, iyagoo halkaas ku dilay lix sarkaal oo ka tirsan ciidamada booliska Kenya, sida ay sheegeen ilo-wareedyo rasmi ah Axaddii.

Afhayeen u hadlay booliska Kenya ayaa sheegay in weerarku uu dhacay subaxnimadii hore ee Axadda, isla markaana rag hubeysan oo laga shakisan yahay in ay ka tirsan yihiin Al-Shabaab ay adeegsadeen hub culus si ay u weeraraan xerada ciidamada keydka.

Weerarka waxaa ku dhintay lix askari, iyadoo afar kale ay ku dhaawacmeen, kuwaas oo la dhigay isbitaal.

Ururka Al-Shabaab, oo muddo 15 sano ka badan dagaal kula jiray dowladda Federaalka Soomaaliya, ayaa sii kordhiyay weerarada xuduudka, gaar ahaan gobolka waqooyi-bari ee Kenya.

Kooxdu waxay saldhigyo ku leedahay degaanka Booni, oo ku dhow xuduudda Kenya iyo Soomaaliya, halkaas oo ay si joogto ah uga weeraraan ciidamada Kenya ee qeybta ka ah hawlgallada la-dagaallanka Al-Shabaab.

Weeraro hore oo gudaha Kenya ka dhacay

Al-Shabaab ayaa horey uga fulisay gudaha Kenya weeraro dhimasho badan sababay, kuwaas oo lala xiriiriyay ka qeybgalka Kenya ee dagaalka ka dhanka ah kooxda Al-Shabaab ee gudaha Soomaaliya.

Weeraradan ayaa qeyb ka ah istiraatiijiyad kooxdu u adeegsaneyso in ay ku beegsato dalalka dariska la ah Soomaaliya ee la dagaallamaya, si ay ugu cadaadiso in ay ka baxaan howlgallada milatari ee ka socda gudaha Soomaaliya.

Talaadadii, safaaradda Mareykanka ee Kenya ayaa soo saartay digniin safar, taasoo ku boorrisay muwaadiniinta Mareykanka inaysan u safrin meelo ka mid ah Kenya, oo ay ku jiraan Garissa iyo gobollo kale oo ku yaalla xuduudda Kenya iyo Soomaaliya, sababo la xiriira halis argagixiso.

Al-Shabaab, oo ah urur argagixiso oo xiriir la leh Al-Qaacida, ayaa sanado badan dagaal kula jiray dowladda dhexe ee Soomaaliya, iyagoo doonaya in ay meesha ka saaraan dowladnimada hadda jirta, ayna ka dhisaan xukun ku saleysan fasiraaddooda adag ee shareecada Islaamka.