Madaxweynayaasha Rwanda iyo Jamhuuriyadda Dimuqraadiga ah ee Congo (DRC) ayaa Talaadadii ku kulmay Qatar, halkaas oo ay si wadajir ah u muujiyeen taageeradooda xabbad-joojinta, sida lagu sheegay war-murtiyeed wadajir ah. Kulankaan ayaa dhacay maalin kadib fashilkii wadahadalladii nabadeed ee Angola.
Kooxda hubaysan ee M23, oo ay Rwanda taageerto, ayaa bilowgii sanadkan weerar ballaaran ku qaaday bariga DRC, oo ah gobol qani ku ah macdanta. Kooxdu waxay la wareegtay laba magaalo oo waaweyn, taasoo sare u qaaday xiisadda u dhexeysa Kigali iyo Kinshasa.
Madaxweynaha Rwanda, Paul Kagame, iyo Madaxweynaha DRC, Felix Tshisekedi, ayaa la kulmay Amiirka Qatar, Sheikh Tamim bin Hamad Al Thani, sida lagu sheegay bayaan ay si wadajir ah u soo saareen saddexda dal.
"Madaxda dowladuhu waxay markale xaqiijiyeen sida ay uga go’an tahay dhammaan dhinacyada inay sameeyaan xabbad-joojin degdeg ah oo shuruud la’aan ah," sida lagu heshiiyey shir-madaxeedkii Midowga Afrika bishii hore, ayaa lagu yiri bayaanka.
"Kulan midho-dhal leh"
War-murtiyeedka ayaa intaas ku daray: "Kulankii miraha dhalay wuxuu gacan ka geystay dhisidda kalsoonida ballan-qaadka la wadaago ee mustaqbal sugan oo xasilloon ee Jamhuuriyadda Dimuqraadiga ah ee Congo iyo gobolka."
Fashilkii wadahadallada Angola iyo M23 oo qabsatay magaalooyin muhiim ah
Horaantii Talaadadii, Angola ayaa ku dhawaaqday in wadahadalladii nabadeed ee DRC la joojiyay sababo la xiriira "duruufo aan la filayn"—oo la rumeysan yahay inay la xiriiraan dhaqdhaqaaqa M23.
Tan iyo Janaayo 2024, M23, oo sheegtay inay u dagaallamayso difaaca danaha Tutsiga ee Congo, ayaa qabsatay magaalooyinka muhiimka ah ee Goma iyo Bukavu, iyagoo si degdeg ah u fidaya. Dagaalkaas ayaa sababay dhimashada in ka badan 7,000 oo qof, sida ay sheegtay dowladda DRC.
AFP ma aysan awoodin inay si madax-bannaan u xaqiijiso tirada dhimashada.
Rwanda oo beenisay inay taageerto M23
Rwanda ayaa si adag u beenisay inay taageero militari siiso M23, balse waxay sheegtay in ay ka walaacsan tahay halis kaga imaaneysa kooxda FDLR ee ku sugan bariga DRC. FDLR waxaa aasaasay hogaamiyayaal ka tirsan qowmiyadda Hutu, oo lagu eedeeyay inay door ku lahaayeen xasuuqii Rwanda ee 1994, kaas oo lagu dilay in ka badan 800,000 oo Tutsi ah iyo Hutu mucaarad ah.
