Wasaaradda Arrimaha Dibedda ee Baraasiil ayaa sheegtay in ay marayso heerarkii ugu dambeeyay ee ay si rasmi ah ugu gudbinayso codsiga ku biiridda dacwaddan ka dhanka ah Israa’iil.

Intii uu socday xasuuqa, Israa'iil waxay burbur baahsan u geysatay inta badan dhulka go'doonsan ee Marinka Qaza, waxayna si dhab ah u barakicisay dhammaan dadkii ku noolaa.

Baraasiil ayaa codsan doonta in ay ku biirto dacwadda xasuuqa ee Koonfur Afrika ay ka gudbisay falalka Israa'iil ee Qaza, taasoo hortaalla Maxkamadda Caalamiga ah ee Caddaaladda (ICJ), sida ay sheegeen ilo xog-ogaal u ah arrintan.

Wasaaradda Arrimaha Dibedda ee Baraasiil ayaa sheegtay Arbacadii in dalku uu marayo "heerarkii ugu dambeeyay" ee gudbinta codsiga ku biirid rasmi ah oo ku aaddan dacwadda xasuuqa ee Koonfur Afrika ay ka gudbisay Israa'iil.

Koonfur Afrika ayaa gudbisay dacwaddan sannadkii 2023, iyadoo ka codsanaysa Maxkamadda (ICJ) in ay ku dhawaaqdo in Israa'iil ay jabisay waajibaadkeedii ka saarnaa Heshiiskii Xasuuqa ee 1948-kii, iyadoo ku eedaysay xasuuq ka dhan ah Falastiiniyiinta ku go'doonsan Qaza.

Waddamo kale sida Turkiga, Isbayn, iyo Kolombiya ayaa horey maxkamadda uga codsaday inay dacwadda ka mid noqdaan.

Go'aankan ayaa waxaa hore u tebiyay wargeyska dalka Baraasiil ee Folha de S. Paulo, waxaana xaqiijisay wakaaladda wararka ee Reuters.

Xasuuqa Israa'iil ee Qaza

Israa'iil ayaa xasuuqa ay ka waddo dhulka go'doonsan ee Qaza ku dishay in ka badan 59,000 oo Falastiiniyiin ah, oo u badan haween iyo carruur.

Ku dhawaad 11,000 oo Falastiiniyiin ah ayaa la rumeysan yahay in ay ku aasan yihiin burburka guryihii lagu dumiyay, sida ay sheegtay wakaaladda wararka rasmiga ah ee Falastiin ee WAFA.

Si kastaba ha ahaatee, khubaro ayaa ku doodaya in tirada dhabta ah ee dhimashadu ay aad uga badan tahay tan ay soo tebiyeen mas'uuliyiinta Qaza, iyagoo ku qiyaasaya in ay gaari karto ilaa 200,000 oo ruux.

Intii uu socday xasuuqa, Israa'iil waxay burburisay inta badan dhulka go'doonsan, waxayna si dhab ah u barakicisay ku dhowaad dhammaan dadkii reer Qaza.

Waxa kale oo ay hor istaagtay gelitaanka gargaarka bini'aadantinimo ee sida weyn loogu baahnaa, waxayna ogolaatay oo kaliya hey’ad gargaar oo muran badan dhalisay oo Maraykanku taageero, taasoo loo aasaasay in lagu marinhabaabiyo hawlaha gargaarka ee Qaramada Midoobay loona cambaareeyay inay tahay "dabin dhimasho."