Xoghayaha Arrimaha Dibadda ee Mareykanka, Marco Rubio, ayaa amar ku bixiyay in la joojiyo ku dhowaad dhammaan gargaarka dibadda ee Mareykanka, marka laga reebo barnaamijyada cuntada degdegga ah iyo taageerada milatari ee laba xulafadiisa ah.
"Ma jiro wax dhaqaale cusub ah oo la bixin doono, mana jiri doono wax ballaarin ama kordhin lagu sameynayo mashaariicda hadda jirta, ilaa ay dib-u-eegis iyo ansaxin ka helaan siyaasadda Madaxweynaha Trump," ayaa lagu yiri qoraal loo diray shaqaalaha Waaxda Arrimaha Dibadda, Jimcihii.
Amarkan, oo aan saameyn ku yeelan doonin Israel iyo Masar, wuxuu halis gelinayaa mashruucyo badan oo malaayiin dollar ku kacaya oo Mareykanku maalgeliyo caalamka, kuwaas oo lagu taageero caafimaadka, waxbarashada, horumarka, tababarada shaqo, la-dagaallanka musuqmaasuqa, amniga iyo barnaamijyo kale oo muhiim ah.
Mareykanka ayaa ah dalka ugu badan ee bixiya gargaarka dibadda, iyadoo sanadkii 2023 uu ku bixiyay qiyaastii $60 bilyan, taasoo u dhiganta 1% miisaaniyadda guud ee Mareykanka.
Amarka Rubio, oo loo diray safaaradaha Mareykanka ee caalamka, ayaana kamid ahayn hakinta barnaamijyada cuntada degdegga ah, sida kuwa wax ka taraya macluusha sii fidaysa ee Sudan.
Tallaabadan waxay daba socotaa amarkii fulinta ee Madaxweyne Donald Trump saxiixay Isniintii, balse hakinta la shaaciyay Jimcaha ayaa si gaar ah niyad-jabisay ku reebtay ha’yadaha gargaarka ka shaqeya maadaama aysan ka mid ahayn ka-dhaafista barnaamijyada badbaadada caafimaadka, sida rugaha caafimaadka iyo ololayaasha tallaalka.
Sida uu sheegay sarkaal hore oo ka tirsan Hay’adda Horumarinta Caalamiga ee Mareykanka (USAID), qaar ka mid ah hay’adaha hormuudka u ah gargaarka ayaa amarkan u fasiranaya amar degdeg ah oo joojinaya dhammaan shaqooyinkoodii gargaarka Mareykanka maalgelin jiray.
"Badankood waxay si dhakhso ah u joojin doonaan howlahooda si aysan ugu bixin kharashaad kale," ayuu yiri sarkaalkaas.
Hakinta maalgelinta "waxay yeelan kartaa natiijo nolol iyo geeri ah" oo saameynaysa carruur iyo qoysas dunida dacaladeeda ah, sida ay sheegtay Abby Maxman, oo ah madaxa Oxfam America.
Qaramada Midoobay, afhayeen ku xigeenkeeda, Farhan Haq, ayaa yiri: "Go'aamadan waa kuwo gooni ah oo laba geesood ah, hase yeeshee waxaan rajeynaynaa in dalalka awooda u leh ay si deeqsinimo leh u maalgelin doonaan dadaallada horumarineed."
TRT World iyo Wakaaladdaha Wararka
