Törkiyä cömhüriyäte tışqı êşlär ministrı Xaqan Fidan İtaliya premyer-ministrı urınbasarı häm tışqı êşlär ministrı Antonio Tayani belän Rimda küreşte.

Pänceşämbe könne uzğan söyläşülärdä NATO berlektäşe häm strategik partnyer bulğan Törkiyä belän İtaliya arasındağı mönäsäbätlärneñ nığıtıluı mäs’äläse quzğatıldı.

Ministr Fidan İtaliyağa yasağan ike könlek säfäre qısalarında töşençä oyışması “Istituto Affari Internazionali”da çığış yasayaçaq.

İke ministr soñğı itep may ayında Törkiyäneñ Antaliya şähärendä oyıştırılğan NATO tışqı êşlär ministrları cıyılışında küreşkän ide.

İke yaqlı mönäsäbätlär

Aprel ayında Törkiyä ilbaşı Räcäp Tayyip Ärdoğan häm İtaliya premyer-ministrı Djordja Meloni Rimda oyıştırılğan 4nçe Törkiyä-İtaliya xökümätlärara oçraşu belän citäklägän ide. Avgustta isä İstanbulda Törkiyä-İtaliya-Liviya öç yaqlı oçraşuı uzdı.

Törkiyä belan İstaliya arasındağı säwdä küläme 2024 yılda 32,2 milliard dollarğa citte häm İtaliya Törkiyäneñ bar dönyada 5nçe, Awrupa berlegendä isä 2nçe iñ zur êksport bazarına äylände. Rimdağı oçraşuda ike il bu sannı 40 milliard dollarğa citkerü maqsatın quydı.

İke il arasında saqlanu xezmättäşlege dä nığıy, Törkiyäneñ keşesez hawa apparatların citeşterüçe “Baykar” şirkäte mart ayında İtaliyaneñ “Leonardo” şirkäte belän dron sistemaları mäs’äläsendä kileşügä qul quydı häm iyundä “Piaggio” isemle aviaśiya şirkäten satıp alu êşlären tögälläde.

Törkiyä şulay uq İtaliya belän “Eurofighter Typhoon” xärbi oçqıçları mäs’äläsendä dä söyläşülär alıp bara.

İtaliya 2020 yıldan birle “Trans Adriatik” ütkärgeçe aşa İtaliyağa gaz qudıruçı “Könyaq gaz koridorı” belän Törkiyäneñ möhim ênergetika partnyerlarınnan berse bulıp tora.

Yaqınça 50 meñ törek İtaliyadä yäşi, 2024 yılda 719 meñnän artıq italiyale Törkiyägä kilde.