Belgeçlärgä kürä Törkiyä cömhüriyäteneñ Milli saqlanu ministrı Yaşar Gülärneñ Hanoyğa säfäre Törkiyäneñ Könyaq-könçığış Aziyadäge êzen kiñäytü täwäkkällelegen kürsätä.
Törkiyäneñ Aziyadäge artuçı angajementı saqlanu ministrınıñ Vyetnamğa yasağan räsmi säfäre belän ber adımğa alda..
Pänceşämbe könne başlanğan ike könlek säfär qısalarında Hanoyda yuğarı däräcäle söyläşülär bar häm 2019 yılda başlatılğan Törkiyäneñ Aziyadäge säyäsi, iqtisadi häm iminlek bağların kiñäytüne maqsat itüçe “Yañadan Aziya” iniśiativasınıñ ber öleşe bularaq kürelä.
Vyetnamlı wazıyfadaşı General Phan Van Giangnıñ çaqıruı belän älege ilgä kitkän ministr Gülär säfärenä başqaladağı mavzoleyğa barıp häm Könyaq-könçığış Aziya ileneñ qoruçı liderına istälegenä urnaştırılğan 1 minutlık tınlıqta xörmät kürsätep başladı.
Annarı törek ministrın Vyetnam saqlanu ministrlığında Giang tarafınnan xärbi tantana belän qarşı aldılar. Tantanadan soñ ike ministr taraflar wäkillekläre qatnaşında ike yaqlı söyläşü ütkärde.
Giang 1978dä diplomatik mönäsäbätlär qorılğannan soñ yaqınça 50 yılda ike il arasındağı duslıq häm küp yaqlı xezmättäşlekneñ üsärgä däwam itüen häm ayıruça saqlanu ölkäsendä tağın da küp xezmättäşlek öçen möhim potenśial buluın assızıqladı.
Gülär şulay uq Hanoydağı Törkiyä ilçelegenä barıp, däwam itüçe êşçänleklär xaqında mäğlümat aldı. Soñınnan Törkiyä ilbaşı Räcäp Tayyip Ärdoğannıñ sälämnären citkergän Vyetnam liderı Lıong Kıong tarafınnan qabul itelde.
Aziyağa qabat yünälü
Analitiklar törek ministrınıñ Vyetnamğa säfäreneñ Törkiyäneñ Könyaq-könçığış Aziyadäge üsüçe köçlär belän partnyerlıkların nığıtu yulındağı añlı tırışlığınıñ çağılışı buluın belderä. Älege adımnıñ Törkiyäneñ soñğı yıllardağı iñ möhim tışqı säyäsät tärtipkä salularınnan bersen çağıldıruın äytä alar.
İstanbuldağı Mädäniyät universitetında Xalıqara mönäsäbätlär professorı İsmäğıyl Ärmağan 2019 yılda başlatılğan “Yañadan Aziya” iniśiativasın borılış noqtası dip atap: “Törkiyäneñ Aziyağa qabat yünälüe tışqı säyäsätneñ tradiśion modellärennän iñ möhim taypılışlarınnan berse ide. Distälägän yıllar buyı Törkiyä zur ülçämdä Awrupa Berlegenä quşılırğa tırıştı läkin bolar näticä birmägäç ul tağın da global qaraş cähate belän êş başqara başladı. Soñğı 20 yılda Törkiyä törle töbäklärgä yünälüçe iniśiativalar başlattı – 2005 yıl “Afrika yılı”, 2006 “Latin Amerika yılı” häm 2019 “Aziya yılı” bularaq iğlan itelde,” – di.
Ärmağan Gülärneñ Vyetnamğa säfäreneñ Törkiyäneñ Aziya-Tın okean strukturalarında tağın da nıqlı urın alu tırışlığınıñ ber öleşe buluına iğtibarnı cälep itä.
Ütkändä Törkiyäneñ İndoneziya häm Malayziya kebek illär belän mönäsäbätläreneñ yuq dip äyter däräcädä äz buluın läkin bu cämğıyätlärdä Törkiyägä qarata qızıqsınunıñ zur buluın belderep: “Könyaq-könçığış Aziyadä Törkiyä yuq ide. Xäzer isä mäğarif, mädäni diplomatiya häm saqlanu sänägäte xezmättäşlege yärdämendä bu tigezsezlekne beterergä tırışa,” – dide.
Aziya belgeçe Lokman Karadağ tübändägeçä citkerä: “Bu – Törkiyäneñ tışqı säyäsätendä töp häm añlı strategiya. Bu - Könbatışnı qaldıru tügel. Törkiyä haman da NATO äğzase; Awrupa häm AQŞ belän tirän bağların däwam itterä. Läkin şul uq waqıtta Aziyaneñ artuçı iqtisadi häm säyäsi awırlığın tanıy häm partnyerlıkların proaktiv räweştä törländerä. Bu Könçığışnı Könbatış urınına saylaw tügel.”
Vyetnam töbäktä iñ tiz üsüçe iqtisadlardan berse, xalıq sanı - 100 millionnan artıq häm texnologiya belän sänägätkä kertelüçe möhim investiśiyaläre bar.
